-
Schneemaa-Fieber isch usbroche
Nachdem ig am Samschti mit de Töchtere e Schneemaa boue ha, het sech d’Manu hüt mitne häre gesetzt und ä Watte-Schneemaa bastlet. Sie hange itz aui verteilt bi üs ir Wohnig und erinnere üs a die aktuelli Jahreszyt 🙂 I überlas de Leser z’rate wele Wattemaa vo welere vo mine Froue isch bastlet worde.
-
Mir hei e Schneemaa boue
Da mir richtig schön Schnee hei gha im Garte, bini mit de Töchtere use und mir hei zäme ä Schneemaa boue. Üse Nachbar, dr’Köbu, het so Freud gha, dass er am Abe no regumässig chli isch ga Wasser druf sprütze, damit er veriiset und so besser gwappnet isch gäge Räge.
-
Bimne Bsuech bi Manus Eltere het d’Sandra mit Sara u Urs im Garte e Schnägge-Stau bastlet u öppe es Dotze Wybergschnägge igsammlet.
-
D’Laura het ds’nächscht grössere Bett übercho u het sech vo Afang a wohl gfüehlt dinne. D’Sandra het mir iifrig ghoufe bim zämeboue u de o grad aui wichtige Spiusache für d’Laura verbi bracht 🙂
-
Da mir ir Tiefgarage nüt söue verändere, hani haut säuber e eifache Ständer für d’Dachbox bastlet.
-
Und wieder einisch hani chli bastlet. Diesmau het’s ds’Geburtstags-Gschenk für d’Ste, mi Schwoscht, gä. I ha d’Skyline vo New York us Papier usgschnitte, mit Note hingerleit u aschliessend aues grahmt.
Dä Blog-Post isch nachträglech erfasst worde, da Stes Geburtstag und Fescht ersch später sy cho. Und blöderwys hani vergässe es Photo z’mache…
-
D’Laura het itz o ihri eigeti Schublade im Wohnzimmer übercho. Es brucht zwar no chli bis sie se säuber cha bediene, aber für machts ds’Ufruume eifacher so.
-
Die lang erwarteti Lieferig mit de Mittu-Auter-Klamotte isch endlech bi üs itroffe. Itz chani mi dra mache u dr’agfangnig Chettepanzer fertig steue u de a Manus Lederwams dra montiere.
-
Rein us Freud hani e LED-Liechterchetti hinger dr’Chopfete vom Bett montiert. So hei mir itz d’Müglechkeit Ambient-Light z’erzüge wenn gwünscht (oder schlicht e Liechtquelle wo mi nid weckt we d’Laura no chli Miuch überchunnt )
-
D’Sandra het mir tatchräftig ghoufe bim zämeschrüble vom neue Bett wo mir üs zueche ta hei. Sie het chönne häbe, Schrubezieher und Schrübli hole u bringe, und ab und zue schmüselig cho beobachte was ig itz grad mache.