Ach, die schöne Momente wenn chlini Ching/Bebe Spinat esse (oder verteile) – i diesem Fau sogar z’erschte Mau überhoupt.
Mir hei üs mit Pidu (mi Götti) u sir Frou Therese troffe und sy zäme fein ga zNachte und hei derbi dorfet über Lloret, Spanie, Ferie u schüsch no auerlei.
A mim erschte Ferietag hani no 2-3 Sache ds’Bern wöue/müesse organisiere, und ha die Glägeheit grad gnutzt zum mitem John zäme ga z’Mittag ässe. I ha no grad Glück gha, het er Zyt gha und isch nid vou Termine gsy.
Zur Fyr vo üser Eidgenosseschaft hei mir iglade u i ha öppis Neus am Grill usprobiert: Pulled Pork. Das sy knapp 2.5 kg Schweinehals woni bereits am Morge am 7ni ufe Grill ta u so öppe 11 Stung la niedergaare.
Grosi u Grösi hei ume eis die ganzi Jungmannschaft zum Grille z’Schenke iglade – es het guet gmundet und so hei mir o ume eis Brösis Söhn gseh, was schüsch ja o nid eifach so passiert.
Trotz em verregnete Wuchenend, hani mi a Grill gsteut u ume kilowys (~ 2.7 kg) SpareRibs gmacht für Monika, Ueli u üs. I ha derbi e neue Rezeptur probiert wo guet isch acho (persönlech fingeni se nid glich guet wie die Bisherigi).
Gotte Ste (Sandras Gotte m) u dr’Jerry sy üs cho bsueche und hei sech la überzüge vo mine Fähigkeite us Schweine-Rippchen lecker Znacht zuez’bereite :)
Aus erschti Versuechskaninchen hei Reby+Lüku müesse härehaute und knauhert Red u Antwort sta bezüglech em Verzehr vo mine 4-Stunde SpareRibs. Drufabe hei mir dr’Abe miteme gmüetlech Brettspiu la usklinge (drum heisst üsi Brettspiu-Gruppe o „Brot und Spiele“). Ah, und d’Manu het öppe dr’bescht Härdöpfu-Salat gmacht wos je hets gits!
Für aui die wo itz glustig sy und o möchte tafle, häbet Geduld. Leider isch dr’Grill z’chli zum meh aus 3 kg SpareRibs z’mache u drum chöi mir euch nid aui glichzytig ilade.
Aber dr’Summer isch no länge, da wird sech ja sicher öppis ergä.