Sone Sunnti eignet sech haut eifach scho guet aus Spiutag. Mit Reby und Lüku zäme hei mir dr’ganz Namitag verspiut und derbi vorauem die neue Spiu intensiv usprobiert.
Ds’wunderschön gstautete Spiu „Jamaica“ (das hei mer chürzlech erwähnt ufem Blog) isch ds’Vierte höch grad viu intensiver; es giut viu meh Seekämpf und o ds’Häbe vomne Schatz isch einiges schwieriger bi soviu piratischer Konkurrenz 🙂
Drufabe hei mir no „Zug um Zug“ gspiut. Das Spiu het d’Manu u mi soso-lala dünkt wo mir’s z’Zwoite usprobiert hei – es het eifach d’Spannig gfäut wüu mir üs nid si id’Queri cho.
Aber o das Spiu spiut sech ganz angers we mä z’Vierte isch. So passierts immer wieder, dass eim öpper e Strecki vor dr’Nase wegbout und mä ds’eigete Ziu 2 Bahnhöf mitenang z’verbinde numeno mit massive Umwege cha realisiere (wo eim natürlech o wieder verbout werde… :)).
Und erneut hani d’Wäutherrschaft in Civilization V chönne erringe. Diesmau hani e Kultursieg errunge und die ganz Wäut treit miner Blue Jeans und lost mini Pop-Musig :)
D’Manu und i hei ds’neue Brettspiu „Jamaica“ usprobiert. Es optisch wunderschöns Spiu wo sech liecht laht la spiele; churzi, knackigi Rundene het; und mä schlüpft id’Roue vo Pirate!
Bild von Matthew Marquand (über http://boardgamegeek.com/)
Mir hei üs nomau am Brettspiu „Die Zwerge“ versuecht und hei dank apasster Taktik e grandiose Sieg chönne heibringe :) Znächscht Mau erhöhe mir dr’Schwierigkeitsgrad uf jede Fau.
Mir si am Namitag a Thunersee chli ga sünnele und sy – i ha mi sogar i ds’Wasser gwagt (muetig muetig, i weiss :)). So schöns Wetter isch scho geil.
Ds’Grosi und dr’Grösi si üs cho bsueche und so hei mir dä schön Namitag uf dr’Terrasse verbracht. Ds’Grosi het sogar chönne dr’Schoppe gä, was sie gloub ungloublech gfreut het.
Mir hei üse Bude-Usflug gha. Am Nami si mir ga Kart fahre in Payerne u am Abe när fein ga ässe im Luce in Bern.
Für mi isches ds’zwoite Mau gsi ufere Kartbahn. Entsprechend bini recht schwach gstartet. Mit jedere witere Rundi bini aber besser u besser dri cho und so hanis im letschte Durchlouf zur zwoitbeste Rundezyt gschafft.
I has aber o mau gschafft mi z’verbremse und prompt bini dr’verchehrt Weg näbe dr’Strecke glandet 🙂
I ha grad mis erste Video bearbeitet und aschliessend bi YouTube ufeglade.
I ha erfougrich mis neue Spiuzüg usprobiert. Quadrokopter flüge isch extrem easy zum Starte, aber ds’Umdenke mit de Richtige während em Flug muessi no üebe :)
Eh voila – wie versproche hie es Video. I ha leider es angers müesse nä, da mis eigetleche Video sech irgendwie nid het wöue la umwandle…
Man beachte bitte o, dassi nid immer so flüge. I ha unabsichtlech e Schauter ar Fernbedienig umgsteut und so d’Lenkig veränderet; zuesätzlech isch dr’Akku o no grad dunger gsi (oder vilech o zum Glück =))