-
Am Nammittag sy mer de när no s Gotti Andrea, Urs u Sara go bsueche. S Wätter het o grad schön mitgschpiut, dass s Ufeloufe vom Bhf Konolfinge här no schön isch gsy. Ufem Heiwäg isches keni füf Minute gange u d Sandra isch mer im Snaggli ipfuset.
-
Mau wider Zyt für d Müettereberatig. Dismau hei mer rächt lang müesse warte bis mer si dra cho. Üses Meitschi isch jetz 8890 Gramm und 71 cm miteme Chopfumfang vo 45,5 cm.
-
Hüt het d Ste geburi gha u mir sy zum Apéro iglade gsy. D’Sandra und ig sy mitem Zug u Poschi zum Pädu u när si mer aui zämä zu Sterrys witer. Proscht Ste – und es isch u fein gsy, au die säubergmachte Sache.
-
D Sandra nimmt inzwüsche ihres Puzzlemätteli scho rächt tifig usenang…u innert churzer Zyt cha sech üses Wohnzimmer ines chliners Chaos verwandle. Si het d Buechstabe u Zahle o scho em Gizmo schmackhaft wöue mache … dä würd sofort häufe spile (wesi nid so würd umefuchtle dermit).
-
Ab hüt gits jetz es Momentli Pastinake aus Gmües für Sandras zMittag. Si schints genau so gärn z ha wie ig…wobi si mi scho müehsamer hei tüecht zum Rüschte u Schnäbserle aus d Rüebli.
-
Endlech hanis gschafft dr’Blog füre Jänner nache z’trage. Es het mi die letschte Wuche die ganz Zyt gnervt. Itz isches so wyt und dir chöit e chli öppis nachelese.
D’Sandra het mir bim blogge o wöue mithäufe und het fougende Text biegstüüret: , mjcm“okl,k cv -xvb b km jm, c Während em Igä vom ihrem bitzeli Text het sie vorauem Fenster versteckt, verchlineret oder gschlosse. Und sie het mir immer mit dr’Muus drigfunket und au heneschiss irgendöppis klickt 🙂
-
Ja, die Spiumatte isch echt dr’Hit. Sie isch so interessant, dass d’Bohne die einzelne Teili doch lieber no chli genauer möcht aluege… und entsprechend d’Matte usenang nimmt.
-
I weiss nid ganz was üsi Tochter hüt g’ritte het, aber anstatt nachem Abe-Schoppe no es Görpsli z’mache, het sie lieber versuecht mir id’Nase z’bisse. Es füeht sech komisch a, isch aber glichzytig u herzig 🙂
-
Mir si Manus Eltere, Sandras Grosmami und Äti, ga bsueche, da mir üs scho es Zytli nüme gseh hei, und hei es feins Fondue zäme gässe.
-
Itz plötzlech faht d’Sandra bim Ischlaf-Liedli a mitsinge. Sie nutzt zwar nume 1 Ton, aber das kompensiert sie mit Lutsterchi. D’Manu gheit regumässig drus vor Lache