-
Dr’Ueli, Sandra’s Ätti, het hüt si Geburtstag gfyret und zumene gmüetleche Kaffee und Kuchen iglade. Happy Birthday Ueli
-
Nachdem ig mi am Mänti bim bastle grüen u blau gärgeret ha, hani hüt chönne Erfouge fyre u ha mis Projekt chönne e guete Schritt vorwärts bringe.
-
Dr’Ueli (mi Schwiegervater) het üs begleitet wo mir uf Dütschland sy. Er isch ab gwüsse Priise recht i ds’Stuune cho u het so sini Modäu-Sammlig grad chli ufgstockt.
D’Sandra isch i dere Zyt bim Grosmami Monika bliebe u so hei o die Zwoi e glungne Abe verbracht zäme.
-
Swiss Toy! Angers aus i vergangene Jahre het mi dr’Video Game Bereich öppe gar nüm interessiert, derfür hani mit Lüku es üs unbekannts Spiu chönne usprobiere, e Hampfele Impuls-Ichouf abwehre (uff, Glück gha :)) und es paar Würfle imne Warhammer Miniature-Match werfe.
-
O dieses Jahr sy mir wieder am Öpfufescht gsy in Wichtrach. Angers aus i de vergangene Jahr hei mir diesmau o richtig guet Wätter gha zu den feine Öpfu-Chüechli u zum Most.
-
Mir sy dr’Match vom SCB gäge EHC Thun ga luege und hei e super Stimmig a dem Cup-Spiu chönne erlebe.
-
Bim Umsteue hei mir im Wohnzimmer e Schublade für Sandras Spiusache igrichtet. I ha die miteme säuber gsetzte Hama-Schriftzug schön agschrybe dass mä o grad weiss weles ihri Schublade isch.
Leider het das de nid so lang ghaute 🙁 Bereits i de erschte 10 Minute wo d’Sandra das Bastlete gseh het, he sie müesse dranne ga chnüble und het ersch ghört wo e Teil ab isch 🙁
-
Nach 4 Jahr hei mir dises Wuchenänd üses Wohnzimmer umgschteut… Es isch no nid ganz fertig, aber im Grosse u Ganze simer z fride mit üser Püetz. D’Sandra het o flissig mitghoufe, Gägeständ hin u här z bigele 😉
D’Hockeysaison het ja wider agfange, da wärde mer sicher öppe o mau wider ilade (dörft natürlech o süsch verbicho)…. U für aui Ungedoudige hie zwöi Vorabbiudli.
-
D’Familie Moor het Ferie und het üs spontan iglade zumne abendleche Käfele mit Bier u guete Gespräch.
Und prompt a dem Abe het d’Sandra eifach nid wöue pfuuse und isch wach bliebe, und wach bliebe … und wach bliebe.
-
Nachere länge Fahrt vom Thurgou nach Bern im Rege ha i mi ufgmacht uf Thun zum mit Lüku u Fründe dr’Fulehung z’fyre.
I bi definitiv z’aut für Settigs… Oder vilech het ds’Uswärts Pfuuse und die astrengendi Hei-Reis ire Tribut gforderet. Ömu bis zum Schluss düremache hani schlicht nüm möge 🙁