Bereits ei Tag vorem Geburtstag sy ds’Gotti Andrea, Mischu, Urs und Sara verbi cho zum mit dr’Sandra ihre Geburtstags z’fyre.
Mir hei üs scho ume mit üsere Brettspiu-Gruppe „Brot und Spiele ;)“ troffe und es 40-jährigs Spiu usprobiert – e voue Erfoug, kes Wunder gits es scho so lang :)
Ds’Spiu heist Cosmic Encounter.
Jede Spieler isch e zuefälligi Alien-Rasse und muess probiere im Verlouf vom Spiu 5 fremdi Planete z’kolonisiere.
D’Regle zum Spiu sy recht simpu; ds’würklech Spezieue isch, dass jedi Alien-Rasse d’Regle vom Spiu irgendwie veränderet oder gar komplett bricht. Es macht echt Spass we mä irgend e Regle zum eigete Vorteil darf breche u aui Angere am Tisch es bitzeli niidisch sy (glichzytig isch mä o chli niidisch uf ds’coole Züg wo die Angere hei und chöi mache).
Und bi 50 verschiedene Rasse im Spiu isch d’Chance minim, dass mä 2 mau die glichi Konstellation vo Sonderregle het.
E sone schöne Tag muess me doch entsprechend nutze. U so sy mir doch grad i die früsch göffneti Badi ghüeneret :)
Vor churzem het d’Sandra agfange ihri glernte Wörter zu eifache Sätz zäme z’setze. So verzeut sie mir am Abe regumässig vo ihrem Tag, was mi sehr interessiert (o wenn ihri Gschichte no einige Lücke und viu Interpretations-Spiuruum hei :))
I ha das schöne Wetter in Brienz ufemne Camping-Platz am Chäfertreffe (eigetleche eher VW Heck-Boxer-Motore Treff) gnosse. Da het’s echt es paar Perle vo Autos zum bestuune gha.
E Kolleg het dr’ganz Samschti zu sim Pouterabe (ehm, Poutertag) iglade. Mir hei e ungerhautsame und liecht alkoholisierte Tag dürlebt und ihn so us sim Junggseue-Dasi erlöst :)
Das ganze het bereits am Morge um die 6 gstartet was fürne Samschti eifach scho cheibe früeh isch. Es isch aber notwendig gsy, da mir dr’ganz Vormittag in Dietwil (zwüsche Luzern und Zug) sy ga Paintball spiele.
Mir hei bereits üsi Badi-Abi füre kommend Summer. Und wüu mir scho im Vorverchouf zuegschlage hei, het’s sogar no Rabatt gä…
Mis Photo gseht zwar nid ideal us (es isch chli es äuters, i ha zwüschezytlech ghübschet :)). Aber jä nu, solang sie mi inelö isch aues guet.
Mir hei üs relativ spontan zumne Spiu-Abe unger dr’Wuche troffe und derbi üses neue „wer darf ds’Spiu uswähle“-System erfougrich chönne isetze.
D’Sandra het es neus Wort glehrt u das grad flissig güebt – sie cha itz neuerdings „Geek-Päpu“ säge, was mi usserordentlech freut u rüehrt.
Mir sy mit dr’Sandra ad’BEA. Sie het viu Freud gha und viu chönne über die viele Tier stuune – u Einigi sogar strichele :)
Eigetlech hätte mir ja nid am Wuchenend wöue ga, aber am Frytig isch ds’Wetter für d’Füchs gsy…
Und o bir Parkplatz-Suechi hei mir nomau Glück gha. Mir hei üs scho fasch entschlosse die Üebig ab z’blase u stattdesse i ds’Däuhöuzli z’gha. Drum bi bi de bim Strasseverchehrsamt zueche gfahre zum mit dr’Manu über ds’wytere Vorgehe z’murmle wo sech grad e Parkplatz het ufta vor üsne Ouge 🙂