Mir hei das schöne Wetter gnutzt und sy uf Spiez chli ga spaziere (bis uf Fulesee übere und retour). So chli dusse sy im Grüene mit Natur, See u früscher Luft het echt guet ta.
D’Sandra het hüt ihre erscht Geburtstag gfyret u Familie sowie Götti u Gotte iglade. Sy het sichtlech Spass gha u wird o i Zuekunft no viu Freud ha a au dene flotte Spiusache wo sie neu übercho het. Viele Dank euch aune.
D’Sandra wachst u wachst und so wird sy scho gli ihre neu Autositz (dä isch hüt glieferet worde) chönne benutze. Hoffentlech gfaut er ihre de o – es isch nämlech eine wo bis zum Schluss cha mitwachse.
Mir sy vo Reby und Lüku iglade worde zum Znacht i ihrer neue Wohnig. E schöni Wohnig und sie hei o bereits guet igruumt und sy acho.
Mir hei aus Mitbringsu für ds’früsch zämezüglete Paar ds’Chartespiu „Love Letter“ mitbracht. E voue Erfoug!
Nachem Znacht und zäme dorfe hei mir grad 4 Partie gspiut à je ca 4-6 Rundine. I ha säute schlecht gspiut (d’Charte dürenang bracht, schüsch es Gstürm gmacht oder eifach o nume Pech gha) und ersch ir zehnte Rundi mi erscht Punkt ghout.
Derfür hani dr’Titu „Amüsantischte Spieler“ igheimset 🙂
No meh Geburtstäg die Wuche :) Hüt hei d’Schnegg-Zwillinge iglade ihres 3 am Rügge mit ordentlech Fleisch und … eh „Getränk“ z’begiesse :D
Mir sy am Abe no iglade gsy, u so hei mir (d’Bohne u ig) dr’Namitag mit Schneggs gnosse.
Dr’Joshua Moor het zu sim vierte Geburtstag iglade zum gmeinsam gfyre – e sehr agnehme Abe unger Fründe. D’Sandra het einisch meh ähnlech-autrigi um sich gha und sech sehr guet gmacht.
Usnahmswis mau e guete Bscheid vom Fiskus. Sie hei gmerkt, dass mir einiges z’viu izaut hei und wei üs itze Geld zrügg gä. Da chönnti mi dra gwöhne :)
Mir hei scho agno, dass d’Sandra de ö direkt faht afa loufe. Nüt da, sie schnagget vo eim Tag ufe anger plötzlech los (und zum Chatzefuetter :))
Hüt isch Internationale Star Wars Tag – May the force be with you!
Und d’Sandra Leia isch o scho cheibe Fan vo dere Titu-Musig – Sie het haut ds Geek-Bluet i sich 🙂
Und für aui die wo sech frage „Werum de hüt?“: May, the 4th wird zu „May the force“. So chunnt das.