D’Sandra isch vom Nachbars-Bueb zure chline Usfahrt ufem Rase iglade worde :)
Vieu Bsuech
Hüt Nammittag hei d‘ Sandra und ig d Bude vou Lüt gha 🙂
Nachdäm churz nachem Mittag s Grosi vo der Sandra isch verbicho, sy im spetere Nami no mi Götti Fritz mit syre Frou der Renate und syre Muetter d Elisabeth (d Schwöschter vo mim Grossvati sel.) usem Thurgou es Bsüechli cho mache. Es isch schön gsy se wider mau ds gseh.
D Sandra und ig hei üs sehr über die zahlriche Gescht gfreut.
Da sech üsi chlini Bohne strikt weigeret (oder geng dervo secklet) ihri Stirnfranse la ds schnide, dass sie ihre nümm id Ouge gheie, het ihre s Reby am Mändig bim ds Nacht es Schwänzli gmacht drus. Das isch bir Sandra so guet acho, dases jetz bim Morge-Wickle bereits heisst ‚Mami, Danna Änzli ache‘ :)
Päpu het e neue Grill *freu* – I has bire Aktion nid chönne verchlemme u bi itz stouze Bsitzer vomne dopplet so grosse Grät wo sogar d’Müglechkeit bietet mitere Rotisserie Güggeli zue z’bereite.
D’Sandra isch mir übrigens bim zämeboue e schöni Hiuf gsy. Sie het mir immer wieder Werchzüg greicht oder Schrübli ufgläse wo mir blöd us dr’Hang gheit sy (jaja, Informatiker u so :-p).
Am hütige Brot und Spiele Abe het sech e Gascht derzue gsellt, wo sech o bi beidne Spiu wacker gschlage het. Es macht haut äbe scho Freud we mä ds’Hobby so cha witergä und Angerne necher bringe.
Üsi Nachbarin het hüt Geburtstag gha und üs zum Brunch/Apero iglade. Mir hei üs so guet zäme ungerhaute, dass mir schlussendlech ersch uf ds’Znacht wieder hei sy :)
Mir hei e neui Art gfunge wie mir mit dr’Sandra chöi ga Ichoufe ohni irgendwie es Theater z’ha… Mir gö itz mitem grosse Leiterwägeli; so isch o grad dr’Transport hei eifacher.
Sandra het viu meh Freud gha auses hie dr’Idruck macht – es het se öppe d’Sunne blendet 🙂
Eigetlech hätte mir mit Moors id’Badi wöue, was mir weg miserablem Wetter aber hei müesse absäge. Mir hei drufabe haut eifach für speter abgmacht und so e gmüetlech Abe mit guete Gspräch, amne Gläsli Wy und mehrere Gläsli Grappa verbracht.
D Sandra und ig sy hüt mau wider bim Frouenarzt gsy. Es isch zwar nur e chlini Ungersuechig gsy. I erster Linie ischs drum gange, d Härztön vo Pfupf ds Lose. Es isch ömu aues irornig mit üsem Bebe.
Einisch meh verblüfft üs d’Sandra mit ihrer Art. Hüt het sie üs plötzlech zeigt, dass o sie Nuschi am Bode nume mit de Füess cha uflese… U vorauem zueverlässig u Glichgwichts-sicher!
Mir hei de grad es chlises Spieli drus gmacht und d’Nuschi vo Fuess zu Fuess witergä ohni dass es abegheit.
Wie sech usegsteut het, het d’Manu mit dem Trick fasch am meischte Müeh, was aber mitem schwangere Buch o guet erklärbar isch.