Wow, was für ne Wuche füre SCB – 3 Matche, 3 Siege, 9 Pünkt! So isches grad viu meh Freud zum de Giele zue z’luege.
Üse SCB gwinnt nach lengerer Durststrecki wieder mau. Die letschte Minute (bim Stand vo 1:0) hei mi packt wie scho syt Wuche nüm – i bi numeno knapp ufem Rand vom Sofa ghocket, so nach hets mi vore Fernseh zoge.
I bi trotz em Ziebele-Märit uf Bern um mit John und Mike es Fyrabe-Bier z’zische. I bi vo Konfetti befreit bliebe was mi grad gar nid truurig macht :)
O diese Winter si mir z’Thun a Märit und hei chli kömmerlet und si drufabe no bi Reby und Lüku ufenes Kafi verbi.
Üsi Bohne het ihri Füess entdeckt. Bsungers lustig finge mir dass sie chuzelig isch und sech bim Füess chafle säuber chuzelet u drum när geng muess gugele.
Mir hei dr’erscht Schnee und d’Wäut um üs isch plötzlech wyss worde. Zum Glück hani miner Winterreife chürzlech no druf bracht :)
Üses Meitschi isch scho fliessig am brabble. Mir si eifach no nid so sicher was sie üs wott verzeue :)
Musikvideo: Adobe Flash Player (Version 9 oder höher) wird benötigt um dieses Musikvideo abzuspielen. Die aktuellste Version steht hier zum herunterladen bereit. Außerdem muss JavaScript in Ihrem Browser aktiviert sein.