Sandra u mini erschti gmeinsami Mahlzyt am Tisch :)
Dr’Günter Struchen het in Burgdorf im Theater Z us sim Buech mit Briefe bsunderer Art vorglese. Mike (Sandras Götti) het ihn ungerstützt und jewius d’Antworte vo de Firme und Ämter glese.
Dr’Günter Struchen het unger www.schlafwandler.ch e eigeti Website wo er regumässig neui Briefe und Antworte ufeladt.
Nach einigem organisiere hei mirs mau wieder gschafft e Spiu-Abe düre z’füehre. Zersch hei mir üs miteme feine Fondue gstärcht, drufabe hei mir vorauem ds’kooperative Spiu „Pandemie“ gspiut – und si cheibe guet gsi im Kampf gäge d’Erreger.
Ds’Ziel in „Pandemie“ isches gäge 4 verschiedeni Chrankheits-Erreger Heilmittu z’finge.
Immer wenn e Spieler si Zug beendet het, macht me dr’Zug vom Spiu – i dem Fau Chrankheite usbreite und wes dumm geit sogar e Epidemie erzüge.
Ds’Spiu schaffts immer wieder innert wenige Züg e schynbar kontrollierti Situation z’erskaliere so dass d’Spieler wieder au Häng vou z’tüe hei und vouer Spannig derbi u mitfiebere.
Die 4 Chrankheite hei eigetlech kener Näme vom Spiu her, drum hei mir ne säuber Näme gä:
- rot isch d’Vogu-Grippe (wüu vorauem in Ost-Asien und Ozeanien)
- schwarz isch Pest (früecher ja dr’schwarzi Tod gnennt, oder?)
- gelb isch Hepatitis (wege Gelbsucht)
- blau isch Fettliebigkeit 🙂 (wüus vorauem in Nord-Amerika und West-Europa uftritt)
Nachdem mir i de letschte Tage einiges id’Garage ta hei, hani dr’Sunnti gnutzt zum se wieder chli ufruume. Gseht grad viu besser us vom Platz her.
Tag 2 vo üsem Reisli – Mir si im Vormittag bi mire Oma und em Rene ga käfele. Im Namitag si mir bim Götti Willi und sire Frou Barbara in Winterthur verbi.
450 Kilometer im Auto hocke hei mir scho möge merke, aber das isch e chline Priis für d’Freud wo mir dran hei (und o d’Freud wo mir üsne Gastgeber hei chönne mache).
Ufem Heiweg hei mir spontan no e chline Umweg gmacht und si bim Grosi (mim Mami) ga verbiluege 🙂
Tag 1 vo üsem Ost-Schwyz-Wuchenend: Mir si bir Gotte Bigi und Familie in Stamme z’Bsuech gsi, hei e gmüetleche Abe zäme chönne verbringe und o grad bi ihne übernachte.
I ha o wieder mau mini Cousine und Cousins gseh. Das isch ds’letschte Mau o scho chli länger her…