Bi dem schöne Wetter hei mir üsi chürzlech gchoufti Wasserballon-Abfüllmaschine usprobiert und dr’Sandra totau a die 100 Wasserballön gmacht :) Sie het viu Freud gha a de Ballöne und dr’ganz Rase abgschosse.
Trotz em Hudu-Wetter bini mit dr’Bohne zum Zulgspitz füre gspaziert (i meh aus sie). Ungerwegs het sie viu Freud a de Glungge bewiese – syg’s mit drigumpe oder schüsch chosle. Aber o schüsch isch üs nid längwilig gsy ungerwegs.
D’Resultat vom dütsche Brettspiu Ringtuusch sy da und erneut werde mir es paar Spiu los wo mir nid/nüm gspiut hei u derfür überchöme mir Spiu wo üs aspreche.
D’Zyt wird zeige ob üs die „neue“ Spiu begeistere oder ob mir se de o wieder imene Ringtuusch abiete 🙂
Die neue Spiu wo i de nächschte Tage zu üs gschickt werde sy:
 |
Agricola Im Spiu Agricola isch mä e Buurefamilie vor ca 200 Jahr u muess Fäuder bsteue, Vieh züchte und d’Familie ernähre. Es isch es komplexes Spiu mit viu strategische u taktische Müglechkeite. Es isch bereits 8 jährig und giut aus eis vo de beschte u beliebtischte Spiu überhoupt – mir sy gspannt. |
 |
The Cave Im Spiu The Cave spiut mä e Höhleforscher u muess mitem limitierte Platz im Rucksack (für Nahrig, Seili und Suurstoff) soviu Höhli wie müglech endtecke, darf aber nid vergässe, dass mä dr’Weg use o wieder muess mache. |
 |
Friday Im Spiu Freitag spiut mä Freitag und muess em früsch gstrandete Robinson häufe uf dere wiude Insle z’überlebe. Es isch es „chlises“ aber doch schwierigs Chartespiu für 1 Person. Ideau auso für chli Ungerhautig i de Ferie oder we sech ke Mitspieler fingt. |
I ha mit mire Trouzüge-Kollegin abgmacht für es paar Vorbereitige und Abklärige. Derbi hei mir no chli Seich gmacht woni no nid witer cha druf iga; aber es het unheimlech Spass gmacht – i ha mi i däm Moment knapp 10 Jahr jünger gfüeuht.
Bi so guetem Wetter hei mir dr’Sandra ihre Pool im Garte ufgsteut und es paar Centimeter Wasser dri ta. Sie het nid würklech wöue dri ga bade, isch aber nid müed worde mitem Wasser z’chosle.
Mir hei üs scho ume mit üsere Brettspiu-Gruppe „Brot und Spiele ;)“ troffe und es 40-jährigs Spiu usprobiert – e voue Erfoug, kes Wunder gits es scho so lang :)
Ds’Spiu heist Cosmic Encounter.
Jede Spieler isch e zuefälligi Alien-Rasse und muess probiere im Verlouf vom Spiu 5 fremdi Planete z’kolonisiere.
D’Regle zum Spiu sy recht simpu; ds’würklech Spezieue isch, dass jedi Alien-Rasse d’Regle vom Spiu irgendwie veränderet oder gar komplett bricht. Es macht echt Spass we mä irgend e Regle zum eigete Vorteil darf breche u aui Angere am Tisch es bitzeli niidisch sy (glichzytig isch mä o chli niidisch uf ds’coole Züg wo die Angere hei und chöi mache).
Und bi 50 verschiedene Rasse im Spiu isch d’Chance minim, dass mä 2 mau die glichi Konstellation vo Sonderregle het.
E Kolleg het dr’ganz Samschti zu sim Pouterabe (ehm, Poutertag) iglade. Mir hei e ungerhautsame und liecht alkoholisierte Tag dürlebt und ihn so us sim Junggseue-Dasi erlöst :)
Das ganze het bereits am Morge um die 6 gstartet was fürne Samschti eifach scho cheibe früeh isch. Es isch aber notwendig gsy, da mir dr’ganz Vormittag in Dietwil (zwüsche Luzern und Zug) sy ga Paintball spiele.
We mä dr’Finger es birebitzeli nass macht u när dermit am Ohre-Loch geit ga chräbele, de tönts wie Pac-Man :)
I bitte Aui wo das hei müesse usprobiere churz e Kommentar z’hingerla 🙂
Dr’Günter Struchen het in Burgdorf im Theater Z us sim Buech mit Briefe bsunderer Art vorglese. Mike (Sandras Götti) het ihn ungerstützt und jewius d’Antworte vo de Firme und Ämter glese.
Dr’Günter Struchen het unger www.schlafwandler.ch e eigeti Website wo er regumässig neui Briefe und Antworte ufeladt.
Hüt het’s grad 2 Mails gä vo Chunde wo mi zum Schmunzle bracht hei. Ei Chund het gschrybe er möchti „eine Neuinstallation auf einer Tablette vornehmen“, und e andere Chund „konnte sich nicht mit dem Admin-Benutzer einlochen“.
Da het d’Autokorrektur zwoimau unglücklech zuegschlage 🙂