Was fürne Match! Obwou mir üser SCB-Abos eigetlech witer verchouft hei, hani dr’Saison-Uftackt im Tempu vo de „eigete“ Plätz us dörfe miterlebe – u när no grad ds’Tatze-Derby gäge Langnou.
Mie hei ume eis e Bsuech bim Frouarzt gmacht u hei e Blick uf Pfupf gworfe. Sie entwicklet sech sehr guet was üs sehr freut. Ah, d’Sandra het bim Ultraschaue dörfe häufe und em Doktor de gar 2-3 mau zviu ufem Computer umedrückt :)
Usem Nüt use het mi d’Manu miteme ibeizte Rehpfeffer mit Chegele, Rotchrut u Spätzli überrascht. Sie isch zu urecht usicher gsy, ds’Esse isch super fein gsy!
Nachemne Juli mit viune Feschtli ha ig nachem 1. Ougschte beschlosse e Alkohou-freie Ougschte z’mache, wo ig soebe ohni Abstriche cha erfougriche abschliesse.
Es het es dr’eint oder anger Moment gä woni gärn hatt agstosse, aber abgseh vo dem hani nie drum truuret oder ds’Riisse gha.
Mir sy in Excenevex zure Wuche Glamping (Glamour Camping) acho und hei üses vorinstallierte Wohnmobil chönne i Bezug nä. Das wird sicher e gmüetlechi Wuche.
Ferie :)
Ds Schueujahr het agfange und dementsprächend o s MuKi-Turne. D’Sandra und ig sy jetz für dises Jahr offizieu agmäudet. Di drü Mönet warte hei grad vieu bracht. Sie het fasch die ganz Stung möge mitspiele und mitseckle. S Thema hüt isch gsy: Mir gö (imaginär) id Badi – ä chlyni Staffete im Sinn vo „i packe mini Badtäsche“ u när hets no e chlyne Poschtelouf gäh, wome mit Matte, Bänkli, Barre etc Wasserrutschine und Sprungbrätt u was mä haut so cha mache ir Badi nachegsteut het. D’Sandra het ei riise Fröid gha (u es het äuä bim umeseckle keni so gschwitzt wie ig).
I ha mir mit Manus Hiuf d’Haar gfärbt (oder äbe la färbe), u das nid mau wäge de graue Haar (wovon ig ja eh kener ha :)), sondern wüu ig chürzlech es äuters Foto ha gseh vo mir mit gfärbte Haar.
I ha der Sandra vor ere Wuche e Badeponcho bsteut, da s Badmänteli wosi vo Götti Mike het, langsam chly chlii isch worde. Mir heine ömu grad sofort müesse aprobiere ;)
