Üsi chlini Laura wird scho i dem junge Auter es richtig gsprächigs Meitschi, um nid z’säge e Ploudertäsche – vo wem sie äch das o hett? :)
Am hütige Tag hätt mis Grosi Geburtstag gha, u so bini a ds’Grab ga d’Ehr erwiese. Aschliessend hei mir no e Spontan-Bsuech bi mim Götti ds’Aarberg aghänkt.
I bi würklech froh hei miner Froue mi begleitet a ds’Grab. Wüu bsungers i dene Momente vermisse i mis Grosi sehr, bsungers wüu ig ire haut o d’Jungmannschaft hätt wöue vorsteue (u umgekehrt).
När z’Bsuech bim Götti hei mir de no es paar Anekdote us ihrem Lebe verzeut, so dass sech o no gfreuti Gedanke zu de bis dahin trüebere gseut hei.
Nachdem i syt afangs Jahr regumässig dr’Donnschtigs Spiu-Abe im phönix bsueche, bini hüt o ad’Thuner Spiunacht. Totau sy mir guet 25 Persone gsy wo hei mitgmacht, was mitunger o zumne 10-Spieler „Nobody is Perfect“ het gfüehrt.
Im gnennti Spiu muess jede Spieler müglechi Antworte uf abstrusi Frage erfinde u när versuecht mä unger au dene komische Antworte die richtigi use z’errate… Mit 10 Spieler wird das zum puure Chaos 😀
D’Thuner Spiunacht wird vom Thuner Spiufachgschäft phönix spiele organisiert und mit Spiu versorgt.
Üsi (nüm so) chlini Bohne isch nach 3-tägige Ferie bi Grosi u Grösi itz wieder daheime u würkt aus wär sie grad viu äuter aus no am Sunnti.
Obwou’s nid lang isch gsy, hei mir se doch scho sehr vermisst, üs aber o gfreut dass sie au es Strahle im Gsicht umetrage.
Die lang erwarteti Lieferig mit de Mittu-Auter-Klamotte isch endlech bi üs itroffe. Itz chani mi dra mache u dr’agfangnig Chettepanzer fertig steue u de a Manus Lederwams dra montiere.
Rein us Freud hani e LED-Liechterchetti hinger dr’Chopfete vom Bett montiert. So hei mir itz d’Müglechkeit Ambient-Light z’erzüge wenn gwünscht (oder schlicht e Liechtquelle wo mi nid weckt we d’Laura no chli Miuch überchunnt )
D’Sandra het mir tatchräftig ghoufe bim zämeschrüble vom neue Bett wo mir üs zueche ta hei. Sie het chönne häbe, Schrubezieher und Schrübli hole u bringe, und ab und zue schmüselig cho beobachte was ig itz grad mache.
Es isch scho verblüffend wie d’Laura vorwärts macht. Sie hebt mittlerwiele dr’Chopf scho über mehreri Minute – teilwys zwar scho mit rechtem Chopfnicke aus wär se amne Rock-Konzert :)
Eigetlech wüsse mir gar nid wie lang sie dr’Chopf säuber chönnt häbe. Mir breche vorher ab und positioniere sie um, schliesslech wei mir ja o nid, dass sie d’Nase atätscht.