Vorem hütige Match isch no dr’Marco Bührer – sines Zeichens 15 Jahr Goalie bi Bern – verabschiedet u sini Nummere unger ds’Stadiondach zoge worde. Er söuber isch zwar recht cool bliebe, aber schüsch isches e emotionale Moment gsy.
Bevor d’Manu u ig a Match sy hei mir no bi Manus Eutere gässe. Derbi isch ds fougende Foto entstande vor Sandra und em Ätti wo gmeinsam es Joghurt teile.
Neui Wysheite vor Sandra bim zVieri: „I ma nid geng so lang warte bis ig fertig bi.“
So schön, hüt Morge het mir d’Waag numeno 82.5 kg azeigt.
Das isch hüt e wunderbar geile Match gsy gäge d’Luganesi. Obwou mit no zmitzt ir Saison sy het sech’s scho vei nach Play-Offs agfüeut – spannends Spiu, u viu Emotione uf und nebem Fäud.
D Laura überchunnt mittlerwiele ihre dritt Zahn – die rechti oberi Schufle. Es chunnt ihre grad recht, wott sie doch numeno ds gliche esse wie o mir uf de Teller hei.
Nach langer Zyt hanis ume einisch chönne irichte bim Umut in Bümpliz e Kebab-Teller ga z’ässe ä. Die Teller sy eifach ire eigete Liga – het doch sogar dr Lüku nachem Esse gmeint es heig gar nüm viu gfäut und er hätt müesse ufgä. Und er ma eigetlech öppe geng meh weder i ässe.
Was für ne Match ir Champions Hockey League gäge JYP Jyvaskyla (FIN). Nacheme verpatzte Start-Drittu (u 2 Gou im hingerlig) hei d Mutze ufdreit u am Schluss mit 3:2 e Sieg igfahre ä.
Nach 36 Jahr BERNMobil isch dr Ueli Eggimann (dr Ätti) i Pension gange. Mir hei ihn zum Zmittag mitere Tramfahrt im Fondue-Tram überrascht (leider ohni Fondue) u am Namitag het er de no zum Apero glade.
Ir grosse Pouseruum vo BERNMobil hei de Uelis Grossching sech am Töggeli-Chaschte versuecht.