Hüt sy mau d’Froue drann gsy mit SCB live 😄 s‘ Reby u ig hei üs e tolle Abe chönne mache u hei ä sehr interessante Mätsch im Tämpu dörfe gniesse, während d’Manne bi de Ching dahei der Mätsch hei vorem TV gluegt.
Nachdäm d’Laura inzwüsche rächt guet dinne desume gwatschlet isch, het si sech hüt o ufem Terrasse- und sogar ufem Grasbode ohni Hiuf vorwärts gwagt.
Obwou dr’SCB das Spiu gäge Biel isch zwar verlore gange, aber was d’Stimmig im Stadion ageit hani gloub no nie e derart geile Match erlebt. Im letschte Drittu (Bern isch mit 5:1 hinger gsy) het d’Stehrampa mau richtig afa aheize und mit dr’Euphorie o aui ufe de Sitzplätz möge mitrisse. Botz geit das ab we 16’000 Fans ihres Team afüre!
Da d’Marianne i de Ferie isch, bi ig verträtigswiis mit der Sandra is Chinderschwümme u mis Mami isch d’Laura cho hüete. Es het cheibä gfägt. I bi am Abe nachem Bade u nachem Muki aber ömu o e Biz kaputt gsy.
I ha hüt Nami s schlächte Wätter mau wider chly kreativ gnutzt. D’Sandra het dörfe wünsche, wasi ihre söu male – sie het sech fürne Hund entschide.
Endlech PlayOffs! Auerdings muess dr’SCB no chli i de PlayOff acho. Dr’erscht Match isch mehrheitlich no wie es normaus Saison-Spiu gsy. Aber das wird scho no, und d’Mutze hei no guet Luft zum Ufdräie und Rocke.
Mir sy hüt ad AgriMesse in Thun, vorauem o zum dr’Ätti ga z’bsueche wo mitem Verein Freunde alter Landmaschinen e Stand ufgsteut het gha — inklusive ere Live-Demonstration wie auti Traktore (i däm Fau e Landini vo 1955) hei müesse gstartet wärde.
Und da ig ihm bir Modernisierig vom Stand ha ghoufe, hei mir itz natürlech o wöue gseh wie dasses itz aues so usgseht und uf d’Bsuecher würkt.
Dr Manu isches glunge es Video z’mache vor Laura we sie am loufe isch. I de letschte Tage isch das meh aus einisch versuecht worde, aber d’Laura het sech de aube geng grad wieder häregsetzt…