Scho ungloublech, wie schnäu die Zyt vergeit. Erschgrad ischer doch no so chly gsy wie üsi Sandra jetz…
Mir sy mau wider bim Chinderarzt gsy. Jetz isch d Sandra scho 57 cm gross und 5930 gramm schwär. Es het die erschte Gigsli gäh u die het si ohni Fieber wäggsteckt. Het bau der ganz Tag nur no pfuuset.
I ha wieder mau e Marsch-Befeu übercho, diesmau steit aber bir „Art des Dienstes“ i wunderschöne Buechstabe „Entlassung“ – hach macht das Freud!
D’Sandra u ig hei hüt dr gester gkouft Chariot wöue usprobiere. Leider hets du när grad afa schiffe, woni du ändlech parat bi gsy. Aber d’Sandra isch durchus interessiert gsy, was das nöis isch.
Mir hei üs nomau am Brettspiu „Die Zwerge“ versuecht und hei dank apasster Taktik e grandiose Sieg chönne heibringe :) Znächscht Mau erhöhe mir dr’Schwierigkeitsgrad uf jede Fau.
Mir hei üs diese Abe mitem Lüku zäme a ds’Brettspiu „Die Zwerge“ gwagt und e doch recht klari Niederlage müesse erliede – u das uf dr’Schwierigkeit Afänger… :( Aber Spass gmacht hets trotzdem u mir werdes wieder versueche :)
„Die Zwerge“ isch es kooperativs Spiu wo aui Spieler gmeinsam am gliche Strang zieh zum ds’Spiu z’besiege. Ds’Spiu louft uf Zyt (nach spätestens 48 Spiuzüg isch Schluss) und d’Spieler müesse e Viuzau vo Ufgabe erfüue zum ds’drohende Unheil chönne abwende.
Jede Spieler schlüpft id’Rolle vomene Zwerg mit ungerschiedleche Fähigkeite (Kampf, Diplomatie, Handwerk) und mä versuecht när nach Müglechkeite dert z’häufe wo dr’eiget Zwerg guet cha.
Mir hei viu gmeinsam gredt und berate um müglechst ds’beste use zhole, aber aus Afänger ohne Erfahrig hei mir üs hie und da sicherlech verzettlet und üser Prioritäte nid optimau gsetzt.
Dr’Schwierigkeitsgrad wird über d’Azahl vo eifache Ufgabe greglet wome muess erfülle bevor me sech cha ufe Endkampf vorbereite und dä när ustrage.
Ds’Spiu bietet insgesamt 8 eifache Ufgabe (mir hei mit lediglich 4 gspiut :)) und 3 verschiedeni Endkampf-Szenarie. Ds’Spiu gstautet sech auso nid immer glich und bringt dür d’Abwechslig o nachem x-te Mau spiele no herusforderndi Konstellatione.
E so schön, i bi bereits i mini dritti Polizei-Kontrolle cho :) Diesmau hani sogar dörfe dr’Alk-Test mache – mitem Ergebnis vo 0.00 :)
Wo üsi chlini Bohne bim Reby ufem Schoss glege und liecht a de Arme aghobe worde isch, het sie dr’Chopf säuber möge mitlüpfe – es geit irgendwie aues so schnäu :)
I ha mis au-jährleche Mitarbeiter-Gespräch gha. Es isch guet gloffe u dr’Chrigu isch sehr zfriede mit mire Büetz – das git es guets Gfüeuh.
Ds’einzig Negativ isch, dass ig mi verbrennt ha wüu ig d’Sunne ungerschetzt ha. Itz muessi mit grötete Arme umeloufe 🙁