Miner 2 Froue sy zäme am Musige gsy am E-Piano u d’Sandra het du no recht afa e Ballade zum Beschte gä – da isch viu Herzbluet dri gflosse :)
Mu-Ki-Turne
I bi hüt mit der Sandra is Mu-Ki-Turne -grad bi üsem Schueuhuus- go ineschnuppere. Öbs öppis isch oder öbs no ds früech isch, chani no nid säge. Sie isch uf jede Fau die Jüngschti gsy. Sie het sech chly schwär taa, we me ruhig het söue warte u zuelose bi dä Erklärige, aber sobaud sie het dörfe umeseckle, isch sie vou derbi gsy (u het sogar quiickt derzue). U es Meitschi i ihrem auter hätt sie ömu o scho lehre kenne. Eh ja, jetz luege mer mau wie’s nächscht Donnschtig louft.
Die Spiucharte-Schutzhülle wo mir chürzlech gchouft hei sy echt dr’Bringer. D’Charte lö sech viu gäbiger la mische, füehle sech guet a u nutze sech nid ab (spiut o ke Roue we mä chlebrigi oder schüsch dreckigi Finger het :)).
I ha useme schlichte Biuder-Rahme e Dice-Tray bastlet. So choi mir itz o no spät am Abe würfle u dr’Glas-Tisch isch kes Problem meh :)
Aus Dankeschön für üsi Mithiuf a ihrer Diplomarbeit, het d’Ste, mi Schwoscht, üs aui zumne feine u usgiebige Brunch (irgendwo im Nirgendwo :)) iglade. Merci Ste!
Letscht Wuche hani miner Auto-Schiebe mitere Nano-Versiegelig bearbeitet. I ha e ganze Wuche müesse warte bises chli gregnet het zum dr’Effekt z’teschte. Isch aber echt krass we ds’Wasser vo alleine über d’Schiebe verschwindet ohni dr’Schiebewüscher z’nutze :D
Nachwuchs!
I ha hüt ä sehr wichtige Termin gha. Jetz wüsse mir, dass mit üsem Bebe aues OK isch – u ds Gheimnis cha ändlech glüftet wärde. D Sandra überchunnt gäg ändi Jahr es Gschwüsterti. Mir freue üs sehr 🙂
I bi wieder es Jahr riifer worde :) Viele härzleche Dank a aui wo a mi denkt hei (per Telefon, SMS oder gar sy verbi cho), i ha dä Tag sehr gnosse!
Hüt hani vomene Chund es überschwänglechs Kompliment übercho wüu er isch verblüfft gsy wie schnäu mir so tricky Problem, wo nume schwer (bis gar nid) z’erkläre sy, chöi löse u er wieder cha schaffe. Das tuet guet u macht Freud.
I ha es zytli müesse warte bis mir e Rundi Game of Thrones hei chönne spiele, aber ds’Warte het sech glohnt (für mi). Nachere intensive Erklärig sy mir öppis über 3 Stung dranneghocket und hei zitteret, gfluechet und gspannet zueluegt wie Schlachte um Westeros sy gfochte worde.
Am Schluss isches mir glunge miteme länger plannete Doppuschlag dr’Sieg a mi z’risse – nachdem ds’Reby u d’Manu sech sy id’Haar grate und sech gägesitig dr’Sieg verunmüglechet hei.
Einzige Wermuetstropfe isch, dass ig d’Lannisters ha zum Sieg gfüehrt. Das isch öppe die Adels-Familie wo mi ide Büecher (Lied von Eis und Feuer) am meischte ufregt…