Eis vo de chürzlech ertuuschte Spiu hei mir scho, drum ha ig’s direkt ane Kolleg, wo relativ neu im Hobby isch, la schicke. Er hets mau amne Spiu-Abe bi üs gspiut und es het ihm sehr gfaue, und itz isch er miteme eigete Exemplar überrascht worde :)
Es handlet sech bi däm Spiu um Evolution, es Charte-Spiu wo mä mit verschiedene Eigeschafts-Charte (zB Klettern, Fleischfresser, Hörner etc) Dinosaurier erfingt und die när i Überlebenskampf mit de Dinos vo de angere Spieler lat la trete.
I ha e bsungers länge Mittag gmacht und bi a ds Grab vo mim Grosi u drufabe no bim Götti verbi ufenes Schnaps. Nachdem i letscht Jahr nach langem z’erschte Mau am Grab bi gsy und es mi recht het mitgno, isches mir dieses mau ringer gange.
Liebs Grosi, i vermisse Di.
Bim aktuelle Brettspiu MathTrade chöi mir es paar Spiu loswerde wo mir sowieso nüm gspiut hei u im Gegezug es paar ertuusche wo mir no nid kenne. Itz sy mer gspannt wie guet de die neue Spiu üs gfaue.
I ha doch tatsächlech bim hiesige Flohmärit im Juni mau ä Stand ergatteret. Bis jetz hani immer d Flyer irgendwo gseh hange u denn sy aube scho aui Plätz vergäh gsy. Bi ja de gspannt, wie mir üs aus Verchoufstalänt gäbe und wi üsi Ware wäg gö…
Obwou’s mi afänglech chli agschnäggelet het, hani mi ufgrafft und bi allei a SCB-Mätsch. Und i bi froh hani’s gmacht. Zwar hei d’Mutze ir Verlängerig verlore, aber längwielig isch mir nid gsy – sowou dr’Mätsch, aus o miner Sitznachbäre hei beschti Ungerhautig bote :)
D’Laura isch fangs rächt am Sache vo Zimmer zu Zimmer transportiere…
Voreme Zytli het si vorauem gärn ufrumt. Mittlerwile het sy durchus s Füreschrisse und Puff mache für sich entdeckt.
A der Sandra ihre Fürwehrhelm hets ihre ganz bsunders ataa. Dä geit si immer wider vom Regau go näh im Chinderzimmer, setzt nä sich säuber uf u schnagget wider id Stube.
Manu het mir zur Wiehnacht zwe Itritte füre Daniele Ganser gschenkt; und hüt isches sowit gsy. I ha dr’Abe sehr gnosse u finde ihn ä interessante u ungerhautsame Referent.
Am Dr. Daniele Ganser sys Programm „Am Anschlag“ isch derbi haub Satire, haub Vortrag über zytgenössischi Gschicht.
Er zeigt ahand vo vergangene Ereignis wie ds’Volk isch manipuliert worde (zB während de Golf-Chriege) und zieht derbi o immer wieder Parallele i d’Gägewart, was eim durchus d’Ouge öffnet.
Wär sech derfür interessiert fingt uf syre Homepage mitunger sogar es paar ufzeichneti Vorträg (zB Verdeckte Kriegsführung).
Mir sy ar Fasnacht gsy aus Addams Family – und mou, mir hei viu Lob, Kompliment und Foto-Afrage übercho. So macht das würklech extrem Spass :)
