Endlech PlayOffs! Auerdings muess dr’SCB no chli i de PlayOff acho. Dr’erscht Match isch mehrheitlich no wie es normaus Saison-Spiu gsy. Aber das wird scho no, und d’Mutze hei no guet Luft zum Ufdräie und Rocke.
Mir sy hüt ad AgriMesse in Thun, vorauem o zum dr’Ätti ga z’bsueche wo mitem Verein Freunde alter Landmaschinen e Stand ufgsteut het gha — inklusive ere Live-Demonstration wie auti Traktore (i däm Fau e Landini vo 1955) hei müesse gstartet wärde.
Und da ig ihm bir Modernisierig vom Stand ha ghoufe, hei mir itz natürlech o wöue gseh wie dasses itz aues so usgseht und uf d’Bsuecher würkt.
Dr Manu isches glunge es Video z’mache vor Laura we sie am loufe isch. I de letschte Tage isch das meh aus einisch versuecht worde, aber d’Laura het sech de aube geng grad wieder häregsetzt…
Uf Brösis Organisiere häre hei mir üs ufeme Buurehof im Luzernische igfunge zum mis Mami zu ihrem Geburtstag z’überrasche miteme Buurezmorge. Natürlech het sie dr’Brate gschmöckt – ds’Kriminaliste-Gen cha mä haut nid so eifach abschaute ;)
Und es isch offiziell, dr’SCB isch Qualisieger 2016/2017 (angers aus letscht Jahr :)) u itz duuret’s numeno e Wuche bis Play-Offs losgö. Hach, wie ig mi freue!
I ha hüt z’erschte Mau chönne derbi sy we d’Laura komplett alleini louft – sie isch uf mi zuegloffe, guet e Meter, u het sech när i miner Scheiche la gheie.
I ha dieser Tage es luschtigs Comedy „Werbe“-Video gfunge wo sech a Trump richtet und ihm vorschlat nach „America First“ söu er doch „Switzerland Second“ e Chance gä.