Mir hei üses erschte Wiehnachte in Schenkon gfyret bi mim Mami und em Brösi. Nachem Fest het de d Sandra grad dörfe es paar Tag bi Grosi u Grösi i de Ferie bliebe. Published on 17. Dezember 2016 by Pädu Wäger
D’Laura luegt viu Sache vor Sandra ab, haut o ab und zue chli Seich. So het sie hüt abgluegt wie mä tuet Nase grüble… Es het früecher oder später ja so müesse cho :) Published on 14. Dezember 2016 by Pädu Wäger
D Laura verma üs o immer wieder z’überrasche. Diese Morge bim usem Bett nä hei mir festgsteut, dass sie sich ir Nacht söuber scho chli abzoge het – zmingscht ei Ärmu het sie möge usfädle. Wie o immer sie das so gschafft het. Published on 10. Dezember 2016 by Pädu Wäger
Dr’Materiau-Fisu vo Sparta Prag isch ono krass ungerwegs. Dr’ganz Match lang nume churzärmlig ar Bande – u wie mer plötzlech gseh hei o nume i de churze Hose… Published on 7. Dezember 2016 by Pädu Wäger
So flott – dr’Typ, wo 2 Brettspiu vo mir uf Ricardo het ersteigeret, het no e Fläsche Wy derzue gleit, wüu mini Spiu nume für ds’Mindestgebot (je 1.-) weg sy. Published on 22. November 2016 by Pädu Wäger
Vorem hütige Match isch no dr’Marco Bührer – sines Zeichens 15 Jahr Goalie bi Bern – verabschiedet u sini Nummere unger ds’Stadiondach zoge worde. Er söuber isch zwar recht cool bliebe, aber schüsch isches e emotionale Moment gsy. Published on 19. November 2016 by Pädu Wäger
Bevor d’Manu u ig a Match sy hei mir no bi Manus Eutere gässe. Derbi isch ds fougende Foto entstande vor Sandra und em Ätti wo gmeinsam es Joghurt teile. Published on 19. November 2016 by Pädu Wäger
Neui Wysheite vor Sandra bim zVieri: „I ma nid geng so lang warte bis ig fertig bi.“ Published on 18. November 2016 by Pädu Wäger
So schön, hüt Morge het mir d’Waag numeno 82.5 kg azeigt. Published on 15. November 2016 by Pädu Wäger
Das isch hüt e wunderbar geile Match gsy gäge d’Luganesi. Obwou mit no zmitzt ir Saison sy het sech’s scho vei nach Play-Offs agfüeut – spannends Spiu, u viu Emotione uf und nebem Fäud. Published on 12. November 2016 by Pädu Wäger