Mir hei e erschte (leider doch eher dümmläche) Kommentar ufenes Video uf YouTube übercho.
Diese Abe sy miner Ricardo-Auktione für PlayStation3, Games und Lenkrad fertig worde und totau isch meh zäme cho aus ig im Vorfeud erhofft ha. So gfaut’s – meh Batzeli u meh Platz :)
Mir hei uf Ricardo es TrippTrapp für d’Laura ersteigeret, es ganz es Spezieus wie sech het usegsteut – ersteigeret vo Sir Roger Moores Schwiegertochter, sy sicher Bond-Enkuching druffe ghocket.
Nachdem i geschter e ganze Tag dranne vergrüblet ha, isches mir hüt glunge dä Bug uf dr’Website uf iPhones z’lokalisiere und entsprechend o z’behebe.
Um ehrlech z’sy cha ig mir nach wie vor no nid würklech erkläre was d’Zämgehäng vo Ursach und Fehlverhaute genau isch. Es isch haut eine vo dene schregä Bugs wo irgendwie passiere ohni irgendere Logik z’Grund z’liege – EDV haut 🙂
Useme Gespräch mit dr’Manu sy mir uf ds’Thema 10-Fingersystem und schnäu tippe cho. Das het mi doch de grad wunger gno und i ha e entsprechende Test absolviert miteme Resultat wo mi säuber überrascht het.
Für aui wo o gärn würde usprobiere wie schnäu (und genau) sie sy: www.zehnfinger.com
I ha vom Bude-Kolleg e lustigi Website übercho wo mit 24 Frage wie mä öppis seit usefingt vo wo das mä chunnt. Isch echt glunge.
Das Ganze isch vom dütsche Magazin „Der Spiegel“:
http://www.spiegel.de/static/happ/wissenschaft/2015/sprachatlas/v2/dist/#/questions
Hüt hani vomene Chund es überschwänglechs Kompliment übercho wüu er isch verblüfft gsy wie schnäu mir so tricky Problem, wo nume schwer (bis gar nid) z’erkläre sy, chöi löse u er wieder cha schaffe. Das tuet guet u macht Freud.
D’Website het es neus Gwand — nach zwoiehaub Jahr darf mä gloub guet e chli früsche Wind und früschi Farbe uf d’Site bringe :)
Zrügg im Apriu hani uf KickStarter ds Brettspiu Viticulture „backed“ — hüt hätt ds’fertige Produkt vom FedEx-Kurier bi üs söue abglieferet werde, aber mir sy äbe nid daheime gsy :(
Kickstarter.com isch e Crowd-Funding Plattform — e Plattform wo jede sini Idee cha präsentiere und siner Mitmensche um finanzielli Ungerstützig bitte. Die wo när sone Produkt-Idee finanziell ungerstütze, die „backe“ när äbe so wie ig hie das Spiu „backed“ ha.
Es handlet sech konkret um das Projekt hie: Viticulture + Tuscany. Er, Jamey Stegmaier vo Stonemaier Games, het gfragt nach 20’000 US-Dollar, het aber fasch ä haubi Million chönne sammle vo 4333 Backer wo a das Produkt gloubt hei.
Ds’Päckli isch innert eire Wuche i 6 e haub verschiedene Länder gsy — HongKong isch zwar Teil vo China, aber irgendwie doch nid ganz…
I bi per Zuefau über AngularJS (es JavaScript Framework für WebApps) gstouperet und bi heftig dervo beidruckt.
Für aui Interessierte: AngularJS — Superheroic JavaScript MVW Framework