Nachere längere Pouse drücke bir Bohne itz öppe grad 3 Zähn (aui obe) glichzytig düre. D’Schufle schyne aus hätt sie se vom Päpu gerbt :)
Ds’Chnorz vom „Metall-Strumpf“ het sech glohnt. Er macht sech guet guet aus Hauterig für üse Chrütergarte :)
I has chönne irichte dr ersteigeret Garte-Tisch mit Stüeu abzhole (bi Oensinge ume) u de o grad ufsteue. Sie hei üs sogar no grad derzue passendi Chüssi mitgä :)
I ha üsem einte Beton-Pfoste mit viu Müeh und Not e „Metall-Strumpf“ agleit. Botz, isch das e Chrampf gsy.
Sinn vor Sach isch, dass d’Manu när es paar Gwürz und vilech no e paar angeri Pflänzli direkt cha a’Pfoste hänke und so dr’Pfoste optisch chli verschönere.
Und natürlech o früsche Chrütli direkt zur Hang z’ha zum Choche 🙂
U so gseht’s bis itz us:
Und wieder es Geburtstags-Ching meh dieses Jahr (o wes kes Ching meh isch mitem 3 am Rügge :)) – Dr’Simu Brunner, zäges üse Nachber, het zu sim 31. Geburtstag zumne Feschtli iglade. Happy Birthday.
Nachdem mir die Wuche erfougrich üsi Garte-Lounge versteigeret hei, hei mir üs de o grad öppis Neus für d’Terrasse ersteigeret: e Holztisch inklusiv 6 Hochlehner-Stüeu.
Die Angeri wo i de letschte Minute mitbote het, het mi recht möge ärgere. Vorauem wüu sie nid kapiert het wie Ricardo funktioniert.
Sie het nadisna im Mindest-Erhöhigs-Schritt bote und bote und bote und bote… Sie allei het öppe 100 Gebot abgä und isch geng outomatisch überbote worde wüu üses Limit höcher isch gsy.
Sie het sich o viu Zyt gpsart hätt sie eifach o ihres Limit itreit und gluegt ob sie drüber mag oder nid.
Knapp 15 Stund nach erfougrichem Auktions-Endi, isch üsi Garte-Lounge scho nüm üsi, sondern abghout worde. So schnäu chas ga :)
Mir hei üsi Rattan Garte-Lounge erfougrich über Ricardo chönne versteigere mit meh Gebot aus mir dänkt hätte. Ds’guete Wetter und dr kommend WM-Start hei sicher ghoufe.
Mir sy hüt mit de Velos und em voubeladene Chariot id Badi s Steffisburg gfahre. Für d Sandra ischs der erscht Badeusflug mit Bädle gsy – zersch het si möglechscht nur d Zäiespitze wöue driha u nid viu später het si sech säuber vo der Stuefe abe is Wasser gsetzt, dass si bis zur Bruscht im Wasser isch gsy. U het e riise Fröid gha.
