Mir hei d’Andrea, Mischu, Urs und Sara zu SpareRibs vom Grill (4-5 Schtung ufem Grill :)) iglade und gmeinsam lecker u deftig möge mampfe. Üs stört’s da o überhoupt nid, dass dr’Summer langsam Gschicht isch und d’Tage geng chüehler wärde…
Lang het’s duuret bis mir wieder mau e Spiu-Abe hei zstang bracht – derfür het’s umso meh gfägt nach so langer Zyt. Und dr’Kolleg het de o grad sini früschi Fründin mitbracht und se mit dr Brettspiu-Begeisterig agsteckt.
Ach, die schöne Momente wenn chlini Ching/Bebe Spinat esse (oder verteile) – i diesem Fau sogar z’erschte Mau überhoupt.
D’Sandra het hüt ihres Geburtstags-Gschenk iglöst und isch mit dr’Gotte Ste und em Unggle Jerry ä Namitag lang i Zoo. Wie mir ghört hei, het sie’s sehr gnosse, o wenn’s nid immer um d’Tier isch gange.
Mir hei üs när drufabe mit Sterrys bi ihne daheime troffe und no gmeinsam fein zNacht g’ässe.
D’Laura het die letschte Täg grad rächt vorwärts gmacht. No vor eirä Wuche isch sy nur mau zwüschdüre chly uf d Chnöi u wider abe… U jetz leit sie zum Teu bereits mehreri Meter zrügg.
I ha Glägeheit übercho es Spiu z’spiele woni syt über emne Jahr druf blange – Raulways of the World. Und wow, es isch würklech vou u ganz nach mim Gschmack, so dass ig’s bi nächster Glägeheit sicher wieder wirde vorschla.
I ha hüt mine Ouge chum trout, woni ufem Sofa bi ghocket u öppis ha gläse… U sech da plötzlech d’Laura am Sofa ufezieht, bis sie meh oder weniger uf de Füess gstange isch :)
D’Laura isch umzoge.
Nachdäm das mit däm gmeinsame Zimmer in Spanie so guet klappt het, isch d’Laura am Sunnti zur Sandra umzoge. Mir sy no nid ganz ds Fride mit der Möblierig, aber fürs erschte passts eso. D’Sandra het chürzlech am Mittag nachem Pfüsu grad müesse zur Laura is Bett go schmuse 😉
Und itz het d’Hockey-Saison o für mi offizieu agfange mitem Champions Hockey League Spiu SCB gege Black Wings Linz, wo üse SCB miteme souveräne 5:0 für sich het chönne entscheide.
I ha mau wieder Gfeugha u grad denn wöue es Foto füre Blog mache wo’s plötzlech es Gou git 🙂
