I ha mir hüt a üsem „Brot und Spiele ;)“ Abe es Spiu gwünscht woni vor 8 Monet mau ha übercho aber no nie gspiut: „El Grande“ (Spiel des Jahres 1996). Mir sy auso ohni Vorkenntnis i die Rundi und hei es packends und lustigs Spiu dörfe erlebe wo trotz em Auter vo 20 Jahr no immer verma z’packe u begeistere.
Nachere lange Pouse vo fasch eim Jahr (363 Tag) hei d’Manu u ig wieder üses letschtjährige Summer-Chartespiue, Android: Netrunner, vüregno u gspiut.
Es het üs wieder chli bruucht bis mir sy dri cho. Aber das hei mir nid angers erwartet bimne Spiu wo beidi Site ungerschiedlech spiele mit eigete Regle.
Im Spiu isch öpper e Mega-Konzern mit unsubere Projekt wo er hinger Firewalls schützt und über d’Zyt wott vora triebe zum punkte. Die angeri Person spiut e Hacker wo versuecht a die Projektdate z’glange um so Punkt z’erziele.
Dr’Clou am Spiu isch die asymmetrischi Spiuwys – dr’Konzern spiut nämlech sehr viu Charte verdeckt u cha o Faue uslege ir Hoffnig dr’Hacker gheii druf ine.
Aus Hacker muess mä auso geng uf dr’Huet sy und darf sich nid la locke, glichzytig isch mä aber gforderet z’agiere wüu schüsch dr’Konzern mit sine Macheschafte ungstört dürechunnt.
Bluffe, Doppu-bluffe und e gsungi Portion Mistroue mache das Spiu so spannend.
Mir hei füre 1. Ougschte üsi Brot und Spiele Gruppe und no e witere Gascht iglade zum gmeinsam Grille u drufabe chli Fürwärchle. Letzteres isch wegem Wetter recht id’Hose, was mir derfür mitere Ladig Party-Spiu kompensiert hei :)
Am hütige Brot und Spiele Abe het sech e Gascht derzue gsellt, wo sech o bi beidne Spiu wacker gschlage het. Es macht haut äbe scho Freud we mä ds’Hobby so cha witergä und Angerne necher bringe.
Nach fasch 3 Monet Pouse hani wieder mau es „A Game of Thrones“ Brettspiu gwünscht zum Spiele. Wie scho bim letschte Mau het’s mi sehr möge fessle, und bsungers we e sech grössere Kampf abzeichnet (oder mä vomne Gägner überrascht wird) stigt dr’Puls grad nomau meh :)
Diesmau hei mir e extra 4-Spieler Variante gspiut wo vorauem d’Siegbedingige chehrt und d’Spiuzyt sött verchürze (was üs überhoupt nid glunge isch).
Im Basisspiu spiut mä bis öpper 7 Festige oder Burge unger sire Kontrolle het (oder maximau 10 Runde); hie het jede Spieler verschiedeni Ziel wo Pünkt gäbe we mä se cha erfülle (sie gäbe o nid für jede Spieler glichviu Punkt, da d’Fraktione ja i ungerschiedleche Regione vor Charte starte).
Dr’gross Vorteil vo dere Variante isch vorauem, dass erfüllti Ziu Siegpunkt gäbe wo nüm chöi verlore ga (angers aus Burge wo vo angere Spieler wieder chöi zrügg eroberet wärde).
Chum vom Camping zrügg, hei mir de o no grad e Brot und Spiele ;)-Abe gha. Diesmau sy vorauem Team-basierti Spiu gspiut worde (2-vs-2), wobi bim einte Spiu d’Teams ersch im Verlouf vom Spiu sy bekannt worde.
D’Resultat vom dütsche Brettspiu Ringtuusch sy da und erneut werde mir es paar Spiu los wo mir nid/nüm gspiut hei u derfür überchöme mir Spiu wo üs aspreche.
D’Zyt wird zeige ob üs die „neue“ Spiu begeistere oder ob mir se de o wieder imene Ringtuusch abiete 🙂
Die neue Spiu wo i de nächschte Tage zu üs gschickt werde sy:
 |
Agricola Im Spiu Agricola isch mä e Buurefamilie vor ca 200 Jahr u muess Fäuder bsteue, Vieh züchte und d’Familie ernähre. Es isch es komplexes Spiu mit viu strategische u taktische Müglechkeite. Es isch bereits 8 jährig und giut aus eis vo de beschte u beliebtischte Spiu überhoupt – mir sy gspannt. |
 |
The Cave Im Spiu The Cave spiut mä e Höhleforscher u muess mitem limitierte Platz im Rucksack (für Nahrig, Seili und Suurstoff) soviu Höhli wie müglech endtecke, darf aber nid vergässe, dass mä dr’Weg use o wieder muess mache. |
 |
Friday Im Spiu Freitag spiut mä Freitag und muess em früsch gstrandete Robinson häufe uf dere wiude Insle z’überlebe. Es isch es „chlises“ aber doch schwierigs Chartespiu für 1 Person. Ideau auso für chli Ungerhautig i de Ferie oder we sech ke Mitspieler fingt. |
Mir hei üs wieder mit üsere Spiu-Gruppe troffe und 3 verschiedeni Spiu chönne spiele, eis Spiu sogar 4 mau. I ha grad e recht guete Abe verwütscht u 2 mau dr’erscht Platz erreicht :)
Wenn ig aber so uf d’Statistike luege, de füehrt i üsere Gruppe ke Weg ar Manu verbi. Aus i auem bringt sie die konstantischte u beschte Resultat.
Und i bi froh e Gegespielere z’ha wo mi immer wieder forderet und d’Messlatte vorgit.
Mir hei üs scho ume mit üsere Brettspiu-Gruppe „Brot und Spiele ;)“ troffe und es 40-jährigs Spiu usprobiert – e voue Erfoug, kes Wunder gits es scho so lang :)
Ds’Spiu heist Cosmic Encounter.
Jede Spieler isch e zuefälligi Alien-Rasse und muess probiere im Verlouf vom Spiu 5 fremdi Planete z’kolonisiere.
D’Regle zum Spiu sy recht simpu; ds’würklech Spezieue isch, dass jedi Alien-Rasse d’Regle vom Spiu irgendwie veränderet oder gar komplett bricht. Es macht echt Spass we mä irgend e Regle zum eigete Vorteil darf breche u aui Angere am Tisch es bitzeli niidisch sy (glichzytig isch mä o chli niidisch uf ds’coole Züg wo die Angere hei und chöi mache).
Und bi 50 verschiedene Rasse im Spiu isch d’Chance minim, dass mä 2 mau die glichi Konstellation vo Sonderregle het.