D’Sandra isch fang recht es Lusmeitschi – hüt het sie mehrmaus nachdem sie gfürzlet het uf mi zeigt u derzue „Päpu!“ grüeft. Sowit sy mir auso scho… :D
D’Sandra het itz glehrt usem Becher z’trinke. Es het nume öppe 2 Zmorge brucht bis sie’s gchopfet het wie dass mes richtig a ds’Muu nimmt.
D’Sandra het mit mir zäme agfange Memory spiele. Mir spiele mit ufdeckte Biuder u sie suecht när jewius ds’passende Gägestück zu däm wo ig zieh. Es isch e wahri Freud ihre zuezluege mit wieviu Freud u Engagement sie mitmacht.
D’Sandra cha itz scho rückwärts loufe (träppele), was schinbar überhoupt nid sebstverständlech isch für ihres Auter (so hei mir hüt erfahre).
I ha mit dr’Sandra zäme ihri Spiusache ufgruumt und derbi isch mir es Video glunge vo eim vo de neuschte Wörter wo d’Sandra i ihrem Wortschatz het.
Nachdem ds’Loufe immer besser geit, isch üsi Bohne itz zuesätzlech fliessig am brabble und brichte. Mir sy nid geng glich sicher was sie meint, aber oft choi mir üs verständige.
D’Sandra louft u het ihrer erschte Schritte ohni Stützi gmacht. Itz wo ds’20 gheit isch, cha sie fasch nüme höre u isch de sicher es Dotze mau zwüsche de Lüt hin u her gschuenet.
D’Sandra het es neus Spieli glernt vo üs und het cheibe Freud we mir e Rundi spiele am Tisch.