Itz wo Tage wieder wärmer wärde u mir meh und meh dusse hocke, hei mir üsser Chüssi usenang gno und neu igfärbt. Zwar es müh müehsam, so het sech’s doch sehr glohnt.
D’Sandra het mir hüt verzeut dass sie mis Bad putzt het, speter hani vor Manu no erfahre, dass o mini Zahnbürste isch putzt worde… Na, da bini aber mau gspannt :)
Rein us Freud hani e LED-Liechterchetti hinger dr’Chopfete vom Bett montiert. So hei mir itz d’Müglechkeit Ambient-Light z’erzüge wenn gwünscht (oder schlicht e Liechtquelle wo mi nid weckt we d’Laura no chli Miuch überchunnt )
D’Sandra het mir tatchräftig ghoufe bim zämeschrüble vom neue Bett wo mir üs zueche ta hei. Sie het chönne häbe, Schrubezieher und Schrübli hole u bringe, und ab und zue schmüselig cho beobachte was ig itz grad mache.
Mir hei Sandras Hochbett no chli erwiteret und en Art Vorhäng dra ghänkt wo us dr’ungere Etage es Spiu-Hüsli mache. D’Sandra het cheibe Freud dranne u ladet üs immer wieder i ebefaus drunger z’schnagge.
Nachdem i geschter ir Romandie bi ga ds’ersteigerete Chinderbett abhole, hani hüt aues chönne zämesetze u dr’Sandra so e riesigi Freud mache.
Während em Zueluege het sie sich immer wieder bedankt und het’s chum möge erwarte bis ändlech aues isch zäme boue gsy und sie het chönne ufechlättere.
Päpu het e neue Grill *freu* – I has bire Aktion nid chönne verchlemme u bi itz stouze Bsitzer vomne dopplet so grosse Grät wo sogar d’Müglechkeit bietet mitere Rotisserie Güggeli zue z’bereite.
D’Sandra isch mir übrigens bim zämeboue e schöni Hiuf gsy. Sie het mir immer wieder Werchzüg greicht oder Schrübli ufgläse wo mir blöd us dr’Hang gheit sy (jaja, Informatiker u so :-p).
Mir sy für ne usziehbare Houztisch ga luege und hei grad Glück gha, dass dr’Interio 20% ufene Artiku nach Wahl git :) Uf die passende Stüeu müesse mir leider no mehreri Wuche warte…
Bim Umsteue hei mir im Wohnzimmer e Schublade für Sandras Spiusache igrichtet. I ha die miteme säuber gsetzte Hama-Schriftzug schön agschrybe dass mä o grad weiss weles ihri Schublade isch.
Leider het das de nid so lang ghaute 🙁 Bereits i de erschte 10 Minute wo d’Sandra das Bastlete gseh het, he sie müesse dranne ga chnüble und het ersch ghört wo e Teil ab isch 🙁
Nacheme gmüetleche Tag ir Badi hei d’Manu u ig am Abe schnäu es 1000er Puzzle zäme gsetzt wo grahmet söu i ds’Chinderzimmer cho u so no chli meh Farb dri bringe.
