Die Spiucharte-Schutzhülle wo mir chürzlech gchouft hei sy echt dr’Bringer. D’Charte lö sech viu gäbiger la mische, füehle sech guet a u nutze sech nid ab (spiut o ke Roue we mä chlebrigi oder schüsch dreckigi Finger het :)).
I ha es zytli müesse warte bis mir e Rundi Game of Thrones hei chönne spiele, aber ds’Warte het sech glohnt (für mi). Nachere intensive Erklärig sy mir öppis über 3 Stung dranneghocket und hei zitteret, gfluechet und gspannet zueluegt wie Schlachte um Westeros sy gfochte worde.
Am Schluss isches mir glunge miteme länger plannete Doppuschlag dr’Sieg a mi z’risse – nachdem ds’Reby u d’Manu sech sy id’Haar grate und sech gägesitig dr’Sieg verunmüglechet hei.
Einzige Wermuetstropfe isch, dass ig d’Lannisters ha zum Sieg gfüehrt. Das isch öppe die Adels-Familie wo mi ide Büecher (Lied von Eis und Feuer) am meischte ufregt…
Da d’Manu grad nid so het möge, ha ig haut allei es Brettspiu gspiut. Mini Wau isch uf Viticulture gfaue (das wo ig über KickStarter backed ha), da das es usgriefte Einzuspieler-Modus het. Und botz, dä Automa-Bot het mi recht möge ufrege wüu er mir guet dri gfunkt het. Schlussendlech hanis ir letschte Rundi knapp gschafft und ha doch no mit 22 zu 20 gwunne — aber das isch uf dr’eifachste Schwierigkeits-Stufe gsy *hmpf*
Während d’Bohne ire Mittagspfüsu gmach het, hani miner erhandlete Spiu chönne uftue, aluege uf kontrolliere. I bi positiv überrascht worde, Eis isch no originauverpackt gsy u imne Angere sy aui Charte i spezieue Schützhüue.
D’Resultat vom Brettspiu Math-Trade sy itz bekannt und bestätiget worde. Mir werde wieder 3 Spiu los wo mir nüm würklech gspiut hei u überchöme derfür 3 angeri, für üs neui Spiu. Mau luege wie üs die gfaue — faus nid, wandere sie früecher oder speter de o wieder ine Trade :)
D’Manu u ig hei üs uf BoardGameGeek bir 10×10 Challenge igschrybe. Ziel isches innerhaub vomne Jahr 10 vo üs definierte Spiu (plus e Alternative) jewius 10 mau z’spiele.
Letscht Jahr bini mit mire ursprüngleche Liste kläglech gschiteret und uf lediglich 57% cho… Mit de 10 meischt-gspiute Spiu wäremer aber uf 98% cho, es isch auso knapp worde.
Dieses Jahr isch d’Lischte dütlech weniger abetürlech und beinhautet nume Spiu wo mir kenne, bsitze u guet finge (letscht Jahr hani versuecht e müglechst viufäutigi Lischte z’mache). Bevor mir üs für d’Challenge itreit hei, hei mir bereits 7 Partie gspiut 🙂
Üsi dieshjährigi Lischte beinhaltet:
| Cover | Spiuname | Partie gespiut 2014 / Kommentar |
|---|---|---|
 |
7 Wonders | 14 Ds’einzige Spiu wo mir no nid bsitze, aber das isch nume e Frag vor Zyt (mir hei beidi im erschte Triester Geburtstag). |
 |
Android Netrunner | 24 Es 2-Player Chartespiu wo dr’Eint e Hacker spiut u versuecht bim Grosskonzern (dr’Anger) gheimi Ungerlage z’erbüte bevor dä siner Projekt cha abschliesse. |
 |
Carcassonne | 21 Carc isch das Spiu wo sech öppe am meischte wandlet je nach je ob mäs z’Zwoite oder mit Meh spiut. Nume z’Zwoite wirds es sehr direkts Konfrontationsspiu, wohingege im Mehrspieler es viu entspannders Mitenang ufchunnt. |
 |
Jaipur | 9 Jaipur isch es Spiu für 2 Persone wo e Partie chum meh aus 30 Minute duret. I has bimene Math-Trade (Brettspiu-Tusch) derzue gleit übercho, e echte Glücksgriff 🙂 |
 |
Robinson Crusoe | 28 DAS kooperative Spiu. Es isch kes eifachs Spiu, mir schytere zu ~55%. Aber es isch packend, dass mir immer wieder zrügg chöme. Und es vermittlet ds’Gfüeu vo Robinson (oder Tom Hanks i Castaway) super. |
 |
Small World | 19 In Small World versuecht mä mit de schrägste Fantasy-Rasse dr’Kontinent z’erobere u z’haute. Ds’Spiu isch vorauem sehr abwächsligsriich wüus mit 14 Rasse und 20 Sonderfähigkeite derhär chunnt und so jedi Partie angeri Rasse-Fähigkeite Kombinatione erzügt. |
 |
Suburbia | 0 Ds’neuschte Spiu i üsere Sammlig — es isch es Wiehnachtsgschenk gsy. Zwüsche 1. Jänner u hüt hei mir aber bereits 2 Partie gspiut und sofort gmerkt, dasses üs liegt. |
 |
Thunderstone Advance | 10 Thunderstone isch verglichbar mit Dominion, het aber dütlech meh Theme und isch dür das packender und o logischer im Ufbou. I vermisse Dominion kes bitzeli meh. |
 |
Viticulture | 9 Das isch ds’Wy-Spiu woni letscht April uf Kickstarter backed ha, und wo im Dezember endlech isch itroffe 🙂 |
 |
Zug um Zug | 27 E Klassiker. Syt mim letschte Geburtstag hei mir nebst Europa no d’Charte vo Indie und vor Schwyz. Europa isch geignet für 4-5 Spieler, d’Schwyzer Charte hingege isch ideal für 2-3. |
 |
Trivial Pursuit | 8 Das hie isch üses auternative Spiu. Ab und zue sy Wüssensspiu genau das womer Luscht hei druf, hankerum chöi sie aber o es blöds Gfüeu hingerla bi de Spieler. |
Und da isches! Das Spiu woni fasch 8 Monet ha druf gwartet isch hüt erfougrich überbracht worde. Es gseht super us – bsungers die metallische Münze wo extra sy gmacht worde. Dr’Hammer!
Dank dr’Hiuf vor Andrea hei mir itz ds „Coop-Disney Sammubiudli-Chleber Chochbuech“ o komplett. Itz muessi numeno chlebe :)
Zrügg im Apriu hani uf KickStarter ds Brettspiu Viticulture „backed“ — hüt hätt ds’fertige Produkt vom FedEx-Kurier bi üs söue abglieferet werde, aber mir sy äbe nid daheime gsy :(
Kickstarter.com isch e Crowd-Funding Plattform — e Plattform wo jede sini Idee cha präsentiere und siner Mitmensche um finanzielli Ungerstützig bitte. Die wo när sone Produkt-Idee finanziell ungerstütze, die „backe“ när äbe so wie ig hie das Spiu „backed“ ha.
Es handlet sech konkret um das Projekt hie: Viticulture + Tuscany. Er, Jamey Stegmaier vo Stonemaier Games, het gfragt nach 20’000 US-Dollar, het aber fasch ä haubi Million chönne sammle vo 4333 Backer wo a das Produkt gloubt hei.
Ds’Päckli isch innert eire Wuche i 6 e haub verschiedene Länder gsy — HongKong isch zwar Teil vo China, aber irgendwie doch nid ganz…