Dr BitCoin het 10’000 €-Grenze überwunde
Das geit grad recht ab mit de Cryptowährige (BitCoin und so).
I ha diese Früehlig o chli öppis i verschiedeni Coins investiert/spekuliert u das Gäut het sech zwüschezytlech verdrüfacht.
D’Laura cha ja cheibe gwungerig luege was dr’Päpu da am Handy macht – ganz sini Tochter we’s um Technik geit :)
Da i dr’Swisscom nid e neui Sim-Charte ha wöue abchoufe, hani haut eifach mini bisherigi ufene Schablone gleit und „fachgerecht“ säuber zuegschnitte. Chli Kante schliife und scho het das wunderbar passt und uf Ahieb funktioniert :)
Nachdem i geschter e ganze Tag dranne vergrüblet ha, isches mir hüt glunge dä Bug uf dr’Website uf iPhones z’lokalisiere und entsprechend o z’behebe.
Um ehrlech z’sy cha ig mir nach wie vor no nid würklech erkläre was d’Zämgehäng vo Ursach und Fehlverhaute genau isch. Es isch haut eine vo dene schregä Bugs wo irgendwie passiere ohni irgendere Logik z’Grund z’liege – EDV haut 🙂
Useme Gespräch mit dr’Manu sy mir uf ds’Thema 10-Fingersystem und schnäu tippe cho. Das het mi doch de grad wunger gno und i ha e entsprechende Test absolviert miteme Resultat wo mi säuber überrascht het.
Für aui wo o gärn würde usprobiere wie schnäu (und genau) sie sy: www.zehnfinger.com
I bi scho chli es Gfeufüdle. I ha im Autobahnabschnitt wo boue wird mi lingg Spiegu are orange Pilone atätscht. Aber nid nume, dass es ke Schade het gä (mä gseht NÜT), besser no isch, dass dr’Wackukontakt vom Spiegublinker derbi isch behobe worde :)
Letscht Wuche hani miner Auto-Schiebe mitere Nano-Versiegelig bearbeitet. I ha e ganze Wuche müesse warte bises chli gregnet het zum dr’Effekt z’teschte. Isch aber echt krass we ds’Wasser vo alleine über d’Schiebe verschwindet ohni dr’Schiebewüscher z’nutze :D
Hüt hani vomene Chund es überschwänglechs Kompliment übercho wüu er isch verblüfft gsy wie schnäu mir so tricky Problem, wo nume schwer (bis gar nid) z’erkläre sy, chöi löse u er wieder cha schaffe. Das tuet guet u macht Freud.
D’Website het es neus Gwand — nach zwoiehaub Jahr darf mä gloub guet e chli früsche Wind und früschi Farbe uf d’Site bringe :)
Zrügg im Apriu hani uf KickStarter ds Brettspiu Viticulture „backed“ — hüt hätt ds’fertige Produkt vom FedEx-Kurier bi üs söue abglieferet werde, aber mir sy äbe nid daheime gsy :(
Kickstarter.com isch e Crowd-Funding Plattform — e Plattform wo jede sini Idee cha präsentiere und siner Mitmensche um finanzielli Ungerstützig bitte. Die wo när sone Produkt-Idee finanziell ungerstütze, die „backe“ när äbe so wie ig hie das Spiu „backed“ ha.
Es handlet sech konkret um das Projekt hie: Viticulture + Tuscany. Er, Jamey Stegmaier vo Stonemaier Games, het gfragt nach 20’000 US-Dollar, het aber fasch ä haubi Million chönne sammle vo 4333 Backer wo a das Produkt gloubt hei.
Ds’Päckli isch innert eire Wuche i 6 e haub verschiedene Länder gsy — HongKong isch zwar Teil vo China, aber irgendwie doch nid ganz…